ek mohabbat thi jo thi tartib mein

ik mohabbat thī jo thī tartīb meñ

varna shai thī kab koī tartīb meñ

ham tujhe kaise banāte ham-safar

ham jiye the zindagī tartīb meñ

maut kā kuchh Dar nahīñ hotā mujhe

zindagī merī kaTī tartīb meñ

ab tū apne ishq kā qissa sunā

dāstāñ apnī to thī tartīb meñ

dil se us kī yaad ko ruḳhsat karo

taaki aa.e zindagī tartīb meñ

taaki ab apnā nasheman ban sake

ḳhud ko le aa to kisī tartīb meñ

vaqt par tāroñ ne chhoḌā āsmāñ

raat din meñ Dhal ga.ī tartīb meñ

naam terā aur mirā joḌā gayā

aur aa.ī har ḳhushī tartīb meñ

chhoḌ 'ahmad' ab ye be-tartībiyāñ

ḳhud ko ab le aa kisī tartīb meñ

ek mohabbat thi jo thi tartib mein

warna shai thi kab koi tartib mein

hum tujhe kaise banate ham-safar

hum jiye the zindagi tartib mein

maut ka kuchh Dar nahin hota mujhe

zindagi meri kaTi tartib mein

ab tu apne ishq ka qissa suna

dastan apni to thi tartib mein

dil se us ki yaad ko ruKHsat karo

taki aae zindagi tartib mein

taki ab apna nasheman ban sake

KHud ko le aa to kisi tartib mein

waqt par taron ne chhoDa aasman

raat din mein Dhal gai tartib mein

nam tera aur mera joDa gaya

aur aai har KHushi tartib mein

chhoD 'ahmad' ab ye be-tartibiyan

KHud ko ab le aa kisi tartib mein