اک مرغ چمن وقت سحر بول رہا ہے

اک مرغ چمن وقت سحر بول رہا ہے

صیاد کا ہر راز نہاں کھول رہا ہے

جذبات کی لہروں پہ ترنم کے یہ نغمے

یہ کون ہے کانوں میں جو رس گھول رہا ہے

حق بات کی عظمت کا تو قائل ہے زمانہ

سچائی کا موتی بہت انمول رہا ہے

کیوں راز ترے دل کا ہوا جاتا ہے افشا

جادو ہے جو سر چڑھ کے ترے بول رہا ہے

ہر بات کسوٹی پہ جو رکھتا ہے زمانہ

ہر حرف تمنا کا تری تول رہا ہے

جب سر سے کفن باندھ کے تو گھر سے چلا ہے

کیوں عزم ترا وقت سفر ڈول رہا ہے

کہتے ہیں جمیلؔ آپ کو بیگانۂ ہستی

یہ راز سر بزم کوئی کھول رہا ہے