ek murgh-e-chaman waqt-e-sahar bol raha hai

ik murġh-e-chaman vaqt-e-sahar bol rahā hai

sayyād kā har rāz-e-nihāñ khol rahā hai

jazbāt kī lahroñ pe tarannum ke ye naġhme

ye kaun hai kānoñ meñ jo ras ghol rahā hai

haq baat kī azmat kā to qaa.il hai zamāna

sachchā.ī kā motī bahut anmol rahā hai

kyoñ raaz tire dil kā huā jaatā hai ifshā

jaadū hai jo sar chaḌh ke tire bol rahā hai

har baat kasauTī pe jo rakhtā hai zamāna

har harf tamannā kā tirī tol rahā hai

jab sar se kafan bāñdh ke tū ghar se chalā hai

kyoñ azm tirā vaqt-e-safar Dol rahā hai

kahte haiñ 'jamīl' aap ko begāna-e-hastī

ye raaz sar-e-bazm koī khol rahā hai

ek murgh-e-chaman waqt-e-sahar bol raha hai

sayyaad ka har raaz-e-nihan khol raha hai

jazbaat ki lahron pe tarannum ke ye naghme

ye kaun hai kanon mein jo ras ghol raha hai

haq baat ki azmat ka to qail hai zamana

sachchai ka moti bahut anmol raha hai

kyon raaz tere dil ka hua jata hai ifsha

jadu hai jo sar chaDh ke tere bol raha hai

har baat kasauTi pe jo rakhta hai zamana

har harf tamanna ka teri tol raha hai

jab sar se kafan bandh ke tu ghar se chala hai

kyon azm tera waqt-e-safar Dol raha hai

kahte hain 'jamil' aap ko begana-e-hasti

ye raaz sar-e-bazm koi khol raha hai