ek na ek sham andhere mein jalae rakhiye

ik na ik sham añdhere meñ jalā.e rakhiye

sub.h hone ko hai māhaul banā.e rakhiye

dil ke hāthoñ se hameñ zaḳhm-e-nihāñ pahuñche haiñ

vo bhī kahte haiñ ki zaḳhmoñ ko chhupā.e rakhiye

kaun jaane ki vo kis rāhguzar par guzre

har guzargāh ko phūloñ se sajā.e rakhiye

dāman-e-yār kī zīnat na bane ham afsos

apnī palkoñ ke liye kuchh to bachā.e rakhiye

ek na ek sham andhere mein jalae rakhiye

subh hone ko hai mahaul banae rakhiye

dil ke hathon se hamein zaKHm-e-nihan pahunche hain

wo bhi kahte hain ki zaKHmon ko chhupae rakhiye

kaun jaane ki wo kis rahguzar par guzre

har guzargah ko phulon se sajae rakhiye

daman-e-yar ki zinat na bane hum afsos

apni palkon ke liye kuchh to bachae rakhiye