ek nae azm se yaran-e-subuk-gam chale

ik na.e 'azm se yārān-e-subuk-gām chale

ġham ke saa.e meñ bhī paate hue ārām chale

ye tamāshā ho kisī din to baḌā kaam chale

vo udhar nikleñ idhar gardish-e-ayyām chale

sāqiyā kis liye mahrūm mai-āshām chale

mai-e-tāza na sahī durd-e-tah-e-jām chale

shahr meñ aaj nahīñ hai mire qātil kā javāb

zulm kī 'umr baḌhe jor kā hangām chale

dosto kuchh to izāla ho pareshānī kā

aaj phir tazkira-e-zulf-e-siyah-fām chale

ham bhī samjhe hue baiThe haiñ havā ke ruḳh ko

zor kab tak tirā ai gardish-e-ayyām chale

kāmyābī rah-e-maqsūd meñ hai 'azm kī baat

kaam kā hausla kuchh ho to baḌā kaam chale

na sila mehr-o-vafā kā na mohabbat kā javāb

haa.e vo shahr-e-nigārāñ se jo nākām chale

aah sayyād ne kyā ḳhuub havā bāñdhī hai

ḳhud hī murġhān-e-chaman khiñch ke tah-e-dām chale

haar kar raah meñ kyoñ baiTh rahe ho yaaro

jis ko chalnā har mire saath vo do-gām chale

hai ye ḳhāsān-e-mohabbat kā hamesha se shi'ār

jab chale chhoḌ ke vo shāhrah-e-ām chale

zindagī ke liye kyā kyā hai musībat darpesh

zindagī ḳhud hī musībat ho to kyā kaam chale

kyā ab uktā gayā jī 'ishq-e-butāñ se 'muslim'

aaj hazrat ye kidhar bāñdh ke ehrām chale

ek nae 'azm se yaran-e-subuk-gam chale

gham ke sae mein bhi pate hue aaram chale

ye tamasha ho kisi din to baDa kaam chale

wo udhar niklen idhar gardish-e-ayyam chale

saqiya kis liye mahrum mai-asham chale

mai-e-taza na sahi durd-e-tah-e-jam chale

shahr mein aaj nahin hai mere qatil ka jawab

zulm ki 'umr baDhe jor ka hangam chale

dosto kuchh to izala ho pareshani ka

aaj phir tazkira-e-zulf-e-siyah-fam chale

hum bhi samjhe hue baiThe hain hawa ke ruKH ko

zor kab tak tera ai gardish-e-ayyam chale

kaamyabi rah-e-maqsud mein hai 'azm ki baat

kaam ka hausla kuchh ho to baDa kaam chale

na sila mehr-o-wafa ka na mohabbat ka jawab

hae wo shahr-e-nigaran se jo nakaam chale

aah sayyaad ne kya KHub hawa bandhi hai

KHud hi murghan-e-chaman khinch ke tah-e-dam chale

haar kar rah mein kyon baiTh rahe ho yaro

jis ko chalna har mere sath wo do-gam chale

hai ye KHasan-e-mohabbat ka hamesha se shi'ar

jab chale chhoD ke wo shahrah-e-am chale

zindagi ke liye kya kya hai musibat darpesh

zindagi KHud hi musibat ho to kya kaam chale

kya ab ukta gaya ji 'ishq-e-butan se 'muslim'

aaj hazrat ye kidhar bandh ke ehram chale