اک نئے روپ نئے رنگ میں ڈھل جاتا ہے

اک نئے روپ نئے رنگ میں ڈھل جاتا ہے

وقت کے ساتھ ہر انسان بدل جاتا ہے

منزلیں زیر قدم اس کے چلی آتی ہیں

ٹھوکریں کھا کے مسافر جو سنبھل جاتا ہے

سازشیں تیری نہ کر پائیں گی ہم کو برباد

آندھیوں میں بھی چراغ اپنا تو جل جاتا ہے

ہم نکلتے نہیں باہر کبھی خودداری سے

ان کا ہر کام خوشامد سے نکل جاتا ہے

ویسے تو پیش نہیں آتا محبت سے کبھی

جب غرض ہو تو ترا لہجہ بدل جاتا ہے

کیا ضروری ہے بلندی سے ہی پھسلے کوئی

پاؤں پستی میں بھی یاسینؔ پھسل جاتا ہے