ek nai tahzib ka aaghaz hai urdu ghazal

ik na.ī tahzīb kā āġhāz hai urdu ġhazal

husn kī tā'rīf kā andāz hai urdu ġhazal

jaane kis kis ne lahū de kar sañvārā hai ise

daur-e-hāzir meñ magar nā-sāz hai urdu ġhazal

shā'iroñ ke ḳhvāb kī tasvīr bantī hai kabhī

dāstān-e-'ishq meñ parvāz hai urdu ġhazal

daur-e-hāzir kī haqīqat bhī bayāñ ye kar rahī

'mīr'-o-'ġhālib' se milā e'jāz hai urdu ġhazal

husn kī gahrā.iyoñ meñ Duub kar dekho zarā

'ishq meñ lipTī huī gul-nāz hai urdu ġhazal

nazm ho yā ho rubā'ī kahiye yā qit'a janāb

shā'irī kī sinf kā shahbāz hai urdu ġhazal

'mīr' 'ġhālib' 'dāġh' 'momin' 'jaun' 'rāhat' ne kahā

har qalam bolā yahī mumtāz hai urdu ġhazal

dil dhaḌak jaate haiñ bas ik husn kī añgḌā.ī par

aaj 'ātish' kī vahī hamrāz hai urdu ġhazal

ek nai tahzib ka aaghaz hai urdu ghazal

husn ki ta'rif ka andaz hai urdu ghazal

jaane kis kis ne lahu de kar sanwara hai ise

daur-e-hazir mein magar na-saz hai urdu ghazal

sha'iron ke KHwab ki taswir banti hai kabhi

dastan-e-'ishq mein parwaz hai urdu ghazal

daur-e-hazir ki haqiqat bhi bayan ye kar rahi

'mir'-o-'ghaalib' se mila e'jaz hai urdu ghazal

husn ki gahraiyon mein Dub kar dekho zara

'ishq mein lipTi hui gul-naz hai urdu ghazal

nazm ho ya ho ruba'i kahiye ya qit'a janab

sha'iri ki sinf ka shahbaz hai urdu ghazal

'mir' 'ghaalib' 'dagh' 'momin' 'jaun' 'rahat' ne kaha

har qalam bola yahi mumtaz hai urdu ghazal

dil dhaDak jate hain bas ek husn ki angDai par

aaj 'atish' ki wahi hamraaz hai urdu ghazal