اک نظر دیکھ لے تو ادھر زندگی

اک نظر دیکھ لے تو ادھر زندگی

کیسے ہوتی ہے تجھ بن بسر زندگی

اک صدی کی طرح عمر گزری مری

زندگی تھی مگر مختصر زندگی

ہاتھ سے ہاتھ چھوٹا ہے جب سے ترا

ڈھونڈھتا ہوں تجھے در بدر زندگی

روح سے دل سے رشتہ رہا ہی نہیں

لوگ جیتے رہے جسم بھر زندگی

سانس بوجھل ہوئی جسم بھی تھک گیا

موت بولی کہ چل میرے گھر زندگی

موت نے اک مکمل ٹھکانا دیا

اب نہ آنا ادھر سے ادھر زندگی

جو کہیں بھی ٹھہر جائے سو اور ہے

اے شجر ہے مسلسل سفر زندگی