اک نظر ہم پہ بھی ہو صنم کم سے کم

اک نظر ہم پہ بھی ہو صنم کم سے کم

دور ہو جائیں درد و الم کم سے کم

اپنے جلووں کی دنیا ادھر بھی سجا

تاکہ ہو میرا گھر بھی ارم کم سے کم

عشق میں فخر سے پا بہ زنجیر ہوں

ٹوٹے ہرگز نہ اس کا بھرم کم سے کم

نوحے شکوے کی بے شک نفی ہی سہی

درد اتنا کہ ہو آنکھ نم کم سے کم

لطف عیش و طرب کی نہیں ہے طلب

میں رہوں تیرے بس ہم قدم کم سے کم

پیار تو مجھ سے کر یا نہ کر غم نہیں

ہاں مگر کر نہ مجھ پر ستم کم سے کم

شعر لکھنا ہے نادرؔ خدا واسطے

دے دے کاغذ سیاہی قلم کم سے کم