ek nazar hi dekha tha shauq ne shabab un ka

ik nazar hī dekhā thā shauq ne shabāb un kā

din ko yaad hai un kī raat ko hai ḳhvāb un kā

gir ga.e nigāhoñ se phuul bhī sitāre bhī

maiñ ne jab se dekhā hai ālam-e-shabāb un kā

nāsehoñ ne shāyad ye baat hī nahīñ sochī

ik taraf hai dil merā ik taraf shabāb un kā

ai dil un ke chehre tak kis tarah nazar jaatī

nuur un ke chehre kā ban gayā hijāb un kā

ab kahūñ to maiñ kis se mere dil pe kyā guzrī

dekh kar un āñkhoñ meñ dard-e-iztirāb un kā

hashr ke muqābil meñ hashr hī saf-ārā hai

is taraf junūñ merā us taraf shabāb un kā

ek nazar hi dekha tha shauq ne shabab un ka

din ko yaad hai un ki raat ko hai KHwab un ka

gir gae nigahon se phul bhi sitare bhi

main ne jab se dekha hai aalam-e-shabab un ka

nasehon ne shayad ye baat hi nahin sochi

ek taraf hai dil mera ek taraf shabab un ka

ai dil un ke chehre tak kis tarah nazar jati

nur un ke chehre ka ban gaya hijab un ka

ab kahun to main kis se mere dil pe kya guzri

dekh kar un aankhon mein dard-e-iztirab un ka

hashr ke muqabil mein hashr hi saf-ara hai

is taraf junun mera us taraf shabab un ka