ek pal bhi kahin rahat-o-aram nahin hai

ik pal bhī kahīñ rāhat-o-ārām nahīñ hai

ye ishq kā āġhāz hai anjām nahīñ hai

Dartā huuñ ki gardish na zamāne kī Thahar jaa.e

ab haath meñ sūraj hai mire jaam nahīñ hai

kyā luuT liyā rindoñ ne mai-ḳhāna hī saarā

yā merī hī qismat meñ koī jaam nahīñ hai

jis paap kī duniyā meñ hai rāvan kā baserā

us svarg sī dhartī pe koī raam nahīñ hai

maiñ ne hī nikhārā hai tirā rang-e-mohabbat

aur merā tirī bazm meñ kuchh kaam nahīñ hai

tum ne hī sitam Dhaa.e haiñ tum ne hī jafā kī

maiñ kaise kahūñ tum pe kuchh ilzām nahīñ hai

sab kuchh hai jab apnā hī to maiñ soch rahā huuñ

insān ko kyoñ pahlā sā ārām nahīñ hai

mere hī gunāhoñ pe nazar kyoñ hai jahāñ kī

hai kaun jo is daur meñ badnām nahīñ hai

hairat hai ki tū us ko nahīñ jāntā lekin

is shahr meñ 'gauhar' koī gum-nām nahīñ hai

ek pal bhi kahin rahat-o-aram nahin hai

ye ishq ka aaghaz hai anjam nahin hai

Darta hun ki gardish na zamane ki Thahar jae

ab hath mein suraj hai mere jam nahin hai

kya luT liya rindon ne mai-KHana hi sara

ya meri hi qismat mein koi jam nahin hai

jis pap ki duniya mein hai rawan ka basera

us swarg si dharti pe koi ram nahin hai

main ne hi nikhaara hai tera rang-e-mohabbat

aur mera teri bazm mein kuchh kaam nahin hai

tum ne hi sitam Dhae hain tum ne hi jafa ki

main kaise kahun tum pe kuchh ilzam nahin hai

sab kuchh hai jab apna hi to main soch raha hun

insan ko kyon pahla sa aaram nahin hai

mere hi gunahon pe nazar kyon hai jahan ki

hai kaun jo is daur mein badnam nahin hai

hairat hai ki tu us ko nahin jaanta lekin

is shahr mein 'gauhar' koi gum-nam nahin hai