ek pareshani alag thi aur pashemani alag

ik pareshānī alag thī aur pashemānī alag

'umr bhar karte rahe ham duudh aur paanī alag

ret hī donoñ jagah thī zer-e-mehr-o-zer-e-āb

misra-e-ūlā se kab thā misra-e-sānī alag

dasht meñ pahle hī raushan thī babūloñ par bahār

de rahe haiñ shahr meñ kāñToñ ko sab paanī alag

kuchh kumak chāhī to zambīl-e-havā ḳhālī milī

ghāTiyoñ meñ kho gayā naqsh-e-sulaimānī alag

ret samjhaute kī ḳhātir nāchtī hai dhuup meñ

bādaloñ kī zid judā hai merī man-mānī alag

mudda.ī haiñ barf baalū raat kāñTe tap havā

jism par hai faujdārī jaañ pe dīvānī alag

vo falak sañgīt meñ miTTī kī dhun to kyā huā

sāre-gāmā se kahīñ hotā hai pādhānī alag

fan meñ tāqat-var bahāv chashm-e-do-ābā kā hai

'zeb-ġhaurī' se kahāñ 'tafzīl' haiñ 'bānī' alag

ek pareshani alag thi aur pashemani alag

'umr bhar karte rahe hum dudh aur pani alag

ret hi donon jagah thi zer-e-mehr-o-zer-e-ab

misra-e-ula se kab tha misra-e-sani alag

dasht mein pahle hi raushan thi babulon par bahaar

de rahe hain shahr mein kanTon ko sab pani alag

kuchh kumak chahi to zambil-e-hawa KHali mili

ghaTiyon mein kho gaya naqsh-e-sulaimani alag

ret samjhaute ki KHatir nachti hai dhup mein

baadalon ki zid juda hai meri man-mani alag

muddai hain barf baalu raat kanTe tap hawa

jism par hai faujdari jaan pe diwani alag

wo falak sangit mein miTTi ki dhun to kya hua

sare-gama se kahin hota hai padhani alag

fan mein taqat-war bahaw chashm-e-do-aba ka hai

'zeb-ghauri' se kahan 'tafzil' hain 'bani' alag