اک قدم بھی وہ مرے ساتھ نہ چل کر آئے

اک قدم بھی وہ مرے ساتھ نہ چل کر آئے

دوستی پر جسے شک بال برابر آئے

اس کے گھر جائیں کہ جو دستک در سنتے ہی

گنگناتا ہوا ہنستا ہوا باہر آئے

اپنے مالک سے میں بس ایک دعا مانگتا ہوں

جو گھڑی آئے مرے حق میں وہ بہتر آئے

آپ کے سارے ہی الزام سر آنکھوں پہ مری

دل دکھانے کا نہ الزام مرے سر آئے

تو نے کہنا نہیں مانا ہے ہمارا لیکن

زندگی ہم ترے کہنے میں برابر آئے

اس مسافر کے قدم چومے ہے منزل اے ہوشؔ

دوسروں کے لئے جو راہ بنا کر آئے