ek qatra KHun kya mere dil ka Tapak gaya

ik qatra ḳhuun kyā mire dil kā Tapak gayā

vīrāna-e-hayāt badāmāñ mahak gayā

pairāhan-e-dil ātish-e-gul se lahak gayā

ḳhirman meñ ārzūoñ ke sho.ala bhaḌak gayā

aate hī un kī yaad ḳhushī mahv ho ga.ī

kohrā chhaTā to dard kā sūraj chamak gayā

maarā phirā talāsh-e-mohabbat meñ dar-ba-dar

apne hī ghar pahuñch ke maiñ afsos thak gayā

ai zabt dekh kam huī jaatī hai raushnī

shāyad mirī nazar se mirā ġham jhalak gayā

jab bhī huā ki bolte kuchh tishna-ārzū

chashm-e-siyāh-e-yār kā sāġhar khanak gayā

gum dasht-e-zindagī meñ huā kārvān-e-shauq

chehra ġhubār-e-ranj-o-alam se chamak gayā

'barq' āgahī ne apnī ik añgḌā.ī sī jo lī

dekhā libās-e-husn-e-tamannā masak gayā

ek qatra KHun kya mere dil ka Tapak gaya

virana-e-hayat badaman mahak gaya

pairahan-e-dil aatish-e-gul se lahak gaya

KHirman mein aarzuon ke shoala bhaDak gaya

aate hi un ki yaad KHushi mahw ho gai

kohra chhaTa to dard ka suraj chamak gaya

mara phira talash-e-mohabbat mein dar-ba-dar

apne hi ghar pahunch ke main afsos thak gaya

ai zabt dekh kam hui jati hai raushni

shayad meri nazar se mera gham jhalak gaya

jab bhi hua ki bolte kuchh tishna-arzu

chashm-e-siyah-e-yar ka saghar khanak gaya

gum dasht-e-zindagi mein hua karwan-e-shauq

chehra ghubar-e-ranj-o-alam se chamak gaya

'barq' aagahi ne apni ek angDai si jo li

dekha libas-e-husn-e-tamanna masak gaya