اک راز کھلا ہم پہ یہ پیدائش گل سے

اک راز کھلا ہم پہ یہ پیدائش گل سے

دل بننے کو تھا دشت سا گنجائش گل سے

ہوتا ہے جنہیں ناز بہت اپنے جنوں پر

جل جاتے ہیں اکثر وہی گرمائش گل سے

زلفوں کو سمیٹے یا کہ چہرے کو سنوارے

ملتی نہیں فرصت اسے آرائش گل سے

یہ آب و ہوا رنگ فلک موسم و شبنم

بھرپور ہوئے جاتے ہیں پیمائش گل سے

انجام پہ رشتہ یہی ٹوٹے گا الجھ کر

آغاز ہے جس کا ابھی فرمائش گل سے

شاعر ہیں ہمیں اپنا بنا کر بھی تو دیکھو

جی اٹھتے ہیں ہم دستک آسائش گل سے