اک شہر ناسپاس کا نوحہ ہے اور میں

اک شہر ناسپاس کا نوحہ ہے اور میں

اب صبح و شام وسعت صحرا ہے اور میں

امید و انتظار کا وقفہ ہے اور میں

دل ہے وہ نیم باز دریچہ ہے اور میں

پھر نکہت صبا کے تعاقب کا ہے جنوں

پھر دل لگی کا ایک وسیلہ ہے اور میں

تم نے یہ کس مقام پہ چھوڑا ہے میرا ساتھ

کس کس پہ چارہ سازی کا دھوکہ ہے اور میں

حالات پر سکون نہ ماحول سازگار

پروردگار تیرا سہارا ہے اور میں

اللہ ایک وقت میں کس کس کو دوں جواب

وہ ہیں جنون شوق ہے دنیا ہے اور میں