ek shaKHs apne hath ki tahrir de gaya

ik shaḳhs apne haath kī tahrīr de gayā

jaise mirā navishta-e-taqdīr de gayā

ik dost mere qalb kī tālīf ke liye

kuchh zahr meñ bujhā.e hue tiir de gayā

barsoñ ke ba.ad us se mulāqāt jab huī

biite dinoñ kī chand tasāvīr de gayā

ghere hue thī mujh ko shab-e-ġham kī tīrgī

vo muskurā ke sub.h kī tanvīr de gayā

chupke se raat aa ke mire ghar ke sahn meñ

ik chāñd mere ḳhvāb kī ta.abīr de gayā

maiñ apne e'timād kā ehsānmand huuñ

mujh ko zamāne bhar meñ jo tauqīr de gayā

vo kaun thā kahāñ kā thā kyā us kā naam thā

'rāhī' jo tere sheroñ ko tāsīr de gayā

ek shaKHs apne hath ki tahrir de gaya

jaise mera nawishta-e-taqdir de gaya

ek dost mere qalb ki talif ke liye

kuchh zahr mein bujhae hue tir de gaya

barson ke baad us se mulaqat jab hui

bite dinon ki chand tasawir de gaya

ghere hue thi mujh ko shab-e-gham ki tirgi

wo muskura ke subh ki tanwir de gaya

chupke se raat aa ke mere ghar ke sahn mein

ek chand mere KHwab ki tabir de gaya

main apne e'timad ka ehsanmand hun

mujh ko zamane bhar mein jo tauqir de gaya

wo kaun tha kahan ka tha kya us ka nam tha

'rahi' jo tere sheron ko tasir de gaya