اک شخص جو ملا تھا بہت کوششوں کے بعد

اک شخص جو ملا تھا بہت کوششوں کے بعد

اس نے بھی ساتھ چھوڑ دیا قربتوں کے بعد

اس شہر اجنبی میں ملے گا سکون اب

اک مے کدہ دکھا ہے کئی مسجدوں کے بعد

اس میں قدم بھی سوچ سمجھ کر رکھو گے کیا

یہ عشق ہے یہ ہوتا نہیں تجربوں کے بعد

ہم بعد وصل جب بھی گئے میکدے کی سمت

کڑوی لگی شراب تمہارے لبوں کے بعد

اے نامہ بر یہ کہنا کہ اچھا نہیں کیا

اک مختصر جواب دیا سو خطوں کے بعد

یاں لوگ ٹوٹ جاتے ہیں اک ہجر میں اثرؔ

میں ہوں کہ جی رہا ہوں کئی حادثوں کے بعد