اک شخص تھا سو اب وہ بیاباں نورد ہے

اک شخص تھا سو اب وہ بیاباں نورد ہے

اس شہر میں ہمارے سوا کون مرد ہے

چہرہ ہر ایک مد مقابل کا زرد ہے

عشق نبرد پیشہ طلب گار مرد ہے

یک جہتیٔ نگاہ کو آواز کون دے

ہر دفتر خیال یہاں فرد فرد ہے

اس جستجو کی دوڑ میں یہ بھید بھی کھلا

رنگ سخن تلاش معانی کی گرد ہے

غرفے سے لمحے لمحے کے جھانکے گا اصل رنگ

چہرے پہ ہم سبھوں کے اگر آب زرد ہے

دست سخن میں تیشۂ باطل نہ دیجئے

دشمن اگرچہ راہ کا ہر سنگ سرد ہے

اس میں حرارتوں کی نئی روح پھونک دو

خواہش کی لاش ایک زمانے سے سرد ہے