اک شکایت ہے ہمیں اس گریۂ غماز سے

اک شکایت ہے ہمیں اس گریۂ غماز سے

ہائے ان کو کر دیا آگاہ دل کے راز سے

ہیں ترے انجام میں حرمان و حسرت ہی نہاں

یہ عیاں ہے قصۂ الفت ترے آغاز سے

بد گمانی اس دل مجروح پر فریاد کی

کب صدائے سوز آتی ہے شکستہ ساز سے

کیا غضب ہیں اس کے برق حسن کی تابانیاں

اک اجالا سا ہویدا ہے جبین ناز سے

تیری جنبش کے میں صدقے اے لب معجز نما

خفت گان بخت جاگ اٹھے تری آواز سے

میری برق آہ دل میں ہی تڑپ کر رہ گئی

مرغ بسمل کی طرح نا آشنا پرواز سے

ہے شب غم میں فقط اس کا تصور ہی انیسؔ

آؤ کچھ باتیں ہی کر لیں ہمدم و ہمراز سے