ek subh-e-arzi thi ki pal mein guzar gai

ik sub.h-e-ārzī thī ki pal meñ guzar ga.ī

ik shām-e-mustaqil thī ki zālim Thahar ga.ī

jalve ke izhdihām meñ kuchh sūjhtā nahīñ

nazzāre kī havas meñ matā.a-e-nazar ga.ī

yaaro ye kis navā-e-mohabbat kī guuñj thī

dekho to saarī bazm ko dīvāna kar ga.ī

un kī to ik adā-e-taġhāful kī baat thī

mere to ḳhvāb-e-shauq kī duniyā bikhar ga.ī

simTī to ek goshe meñ pinhāñ thī vo nigāh

chhalkī to kā.enāt ko sairāb kar ga.ī

āvārgī-e-shauq meñ guzregī ab kahāñ

ik shab to mai-kade kī fazā meñ guzar ga.ī

jaltī hai sar-barahna kaḌī dhuup meñ hayāt

vo chhāñv ahd-e-rafta kī āḳhir kidhar ga.ī

marne lage ho shoḳh nazāroñ pe āj-kal

sanjīdgī mizāj kī 'nāzim' kidhar ga.ī

ek subh-e-arzi thi ki pal mein guzar gai

ek sham-e-mustaqil thi ki zalim Thahar gai

jalwe ke izhdiham mein kuchh sujhta nahin

nazzare ki hawas mein mataa-e-nazar gai

yaro ye kis nawa-e-mohabbat ki gunj thi

dekho to sari bazm ko diwana kar gai

un ki to ek ada-e-taghaful ki baat thi

mere to KHwab-e-shauq ki duniya bikhar gai

simTi to ek goshe mein pinhan thi wo nigah

chhalki to kaenat ko sairab kar gai

aawargi-e-shauq mein guzregi ab kahan

ek shab to mai-kade ki faza mein guzar gai

jalti hai sar-barahna kaDi dhup mein hayat

wo chhanw ahd-e-rafta ki aaKHir kidhar gai

marne lage ho shoKH nazaron pe aaj-kal

sanjidgi mizaj ki 'nazim' kidhar gai