ek subh hai jo hui nahin hai

ik sub.h hai jo huī nahīñ hai

ik raat hai jo kaTī nahīñ hai

maqtūloñ kā qaht paḌ na jaa.e

qātil kī kahīñ kamī nahīñ hai

vīrānoñ se aa rahī hai āvāz

taḳhlīq-e-junūñ rukī nahīñ hai

hai aur hī kārobār-e-mastī

jī lenā to zindagī nahīñ hai

saaqī se jo jaam le na baḌh kar

vo tishnagī tishnagī nahīñ hai

āshiq-kushī o fareb-kārī

ye sheva-e-dilbarī nahīñ hai

bhūkoñ kī nigāh meñ hai bijlī

ye barq abhī girī nahīñ hai

dil meñ jo jalā.ī thī kisī ne

vo sham-e-tarab bujhī nahīñ hai

ik dhuup sī hai jo zer-e-mizhgāñ

vo aañkh abhī uThī nahīñ hai

haiñ kaam bahut abhī ki duniyā

shā.ista-e-ādmī nahīñ hai

har rañg ke aa chuke haiñ fir.aun

lekin ye jabīñ jhukī nahīñ hai

ek subh hai jo hui nahin hai

ek raat hai jo kaTi nahin hai

maqtulon ka qaht paD na jae

qatil ki kahin kami nahin hai

viranon se aa rahi hai aawaz

taKHliq-e-junun ruki nahin hai

hai aur hi karobar-e-masti

ji lena to zindagi nahin hai

saqi se jo jam le na baDh kar

wo tishnagi tishnagi nahin hai

aashiq-kushi o fareb-kari

ye shewa-e-dilbari nahin hai

bhukon ki nigah mein hai bijli

ye barq abhi giri nahin hai

dil mein jo jalai thi kisi ne

wo sham-e-tarab bujhi nahin hai

ek dhup si hai jo zer-e-mizhgan

wo aankh abhi uThi nahin hai

hain kaam bahut abhi ki duniya

shaista-e-admi nahin hai

har rang ke aa chuke hain firaun

lekin ye jabin jhuki nahin hai