ek talluq sa kisi nam se jab hota hai

ik ta.alluq sā kisī naam se jab hotā hai

be-sabab bhī koī jiine kā sabab hotā hai

bārhā sochā magar tum ko batā bhī na sakī

ġham kā ehsās mirī ruuh ko kab hotā hai

DhūñDhtā rahtā hai aksar mire andar tujh ko

merī tanhā.ī kā aalam bhī ajab hotā hai

yuuñ ba-zāhir sabhī anjān nazar aate haiñ

jānte sab haiñ ki is shahr meñ sab hotā hai

uTh gayā jaise zamāne se mohabbat kā chalan

kaun ab kis ke liye ḳhanda-ba-lab hotā hai

lafz bhī khol nahīñ paate kabhī lab apne

dūsrā naam mohabbat kā adab hotā hai

apne āġhāz se chaltī huuñ maiñ anjām kī samt

merī sub.hoñ kā safar jānib-e-shab hotā hai

kisī tinke kā sahārā nahīñ miltā mujh ko

Duub jaanā mirī taqdīr meñ jab hotā hai

chand be-nām se rishte haiñ laboñ par 'ūshā'

koī duniyā meñ kisī kā bhalā kab hotā hai

ek talluq sa kisi nam se jab hota hai

be-sabab bhi koi jine ka sabab hota hai

barha socha magar tum ko bata bhi na saki

gham ka ehsas meri ruh ko kab hota hai

DhunDhta rahta hai aksar mere andar tujh ko

meri tanhai ka aalam bhi ajab hota hai

yun ba-zahir sabhi anjaan nazar aate hain

jaante sab hain ki is shahr mein sab hota hai

uTh gaya jaise zamane se mohabbat ka chalan

kaun ab kis ke liye KHanda-ba-lab hota hai

lafz bhi khol nahin pate kabhi lab apne

dusra nam mohabbat ka adab hota hai

apne aaghaz se chalti hun main anjam ki samt

meri subhon ka safar jaanib-e-shab hota hai

kisi tinke ka sahaara nahin milta mujh ko

Dub jaana meri taqdir mein jab hota hai

chand be-nam se rishte hain labon par 'usha'

koi duniya mein kisi ka bhala kab hota hai