ek tabassum ka tha sauda hum ko

ik tabassum kā thā saudā ham ko

tū ne saste meñ ḳharīdā ham ko

mauj-dar-mauj hai ġham-hā-e-firāq

paar karnā hai ye dariyā ham ko

bhūlte jaate haiñ tujh ko jānāñ

zaḳhm de phir koī taaza ham ko

baiTh jaate kisī dīvār ke saath

kab huā ye bhī gavāra ham ko

ai falak thoḌī sī rahmat ham par

ai zamīñ thoḌā sā TukḌā ham ko

ek tabassum ka tha sauda hum ko

tu ne saste mein KHarida hum ko

mauj-dar-mauj hai gham-ha-e-firaq

par karna hai ye dariya hum ko

bhulte jate hain tujh ko jaanan

zaKHm de phir koi taza hum ko

baiTh jate kisi diwar ke sath

kab hua ye bhi gawara hum ko

ai falak thoDi si rahmat hum par

ai zamin thoDa sa TukDa hum ko