اک تجسس ہے بپا جانے خدا کیا ہوگا

اک تجسس ہے بپا جانے خدا کیا ہوگا

ساتویں سمت بھی دنیا کا تماشا ہوگا

گرد بیٹھی تو نظر آئے گا رستے کا فسوں

نیند ٹوٹی تو کسی خواب کا رونا ہوگا

میں وہ دریا ہوں جو صحرا کی طرف جاتا ہے

میں وہ لمحہ جو گزر کر نہ دوبارہ ہوگا

دھوپ سائے کے تعاقب میں لگی رہتی ہے

وصل دراصل ترے ہجر کا جھانسہ ہوگا

یوں نہ دیکھو کہ مجھے نیک گماں ہونے لگے

یوں نہ چاہو کہ کبھی چھوڑ کے جانا ہوگا

اک اشارے سے بکھر جائے گی دنیا ساری

سرخ سگنل پہ ہوئے عشق ترا کیا ہوگا

کھا گئی آنکھ سے منظر کو اداسی راشدؔ

میری زنبیل میں ہر عکس ادھورا ہوگا