ek taraf talab teri ek taraf zamana hai

ik taraf talab terī ik taraf zamāna hai

pūchhtā hai dil mujh se kis taraf ko jaanā hai

mere ghar vo aa.egā aaj ghar sajānā hai

is taraf kī chīzoñ ko us taraf lagānā hai

naqsh-hā-e-rañgīñ kā ik nigār-ḳhāna hai

zindagī haqīqat hai zindagī fasāna hai

jazba-e-junūn-e-ishq go bahut purānā hai

phir bhī tāza-tar hai ye phir bhī vālihāna hai

pā.eñge ḳhushī bhī ham ranj-o-ġham bhī jheleñge

is jahān meñ jab tak apnā āb-o-dāna hai

dushmanoñ ke ta.ane haiñ dostoñ kī tanqīdeñ

tiir saikaḌoñ haiñ aur ek dil nishāna hai

ātishīñ hai lahja bhī guftugū bhī bārūdī

sochiye 'shafīq' us se kis tarah nibhānā hai

ek taraf talab teri ek taraf zamana hai

puchhta hai dil mujh se kis taraf ko jaana hai

mere ghar wo aaega aaj ghar sajaana hai

is taraf ki chizon ko us taraf lagana hai

naqsh-ha-e-rangin ka ek nigar-KHana hai

zindagi haqiqat hai zindagi fasana hai

jazba-e-junun-e-ishq go bahut purana hai

phir bhi taza-tar hai ye phir bhi walihana hai

paenge KHushi bhi hum ranj-o-gham bhi jhelenge

is jahan mein jab tak apna aab-o-dana hai

dushmanon ke tane hain doston ki tanqiden

tir saikaDon hain aur ek dil nishana hai

aatishin hai lahja bhi guftugu bhi barudi

sochiye 'shafiq' us se kis tarah nibhana hai