ek taswir pe khinch rakhe hain tu ne kitne rang ke dukh

ik tasvīr pe khīñch rakhe haiñ tū ne kitne rang ke dukh

mere musavvir tujh se bane na.ī lekin mere Dhang ke dukh

yaar tirī vo nasrī chintā tū ne sunā.ī sab ne sunī

kaun sunegā jab maiñ chheḌūñgā apne āhang ke dukh

ishq-o-junūñ kī jang huī kal raat badan ke maidāñ meñ

dil ko aaj manāne hoñge biitī raat kī jang ke dukh

qismat kī har thaap ko maiñ sangīt banā.ūñ tū gaa.e

tak-dhan-tā kī dhun par raqs kareñ phir mujh mirdang ke dukh

jaise ik sayyād kī aahaT pā kar panchhī ho ga.e phur

terī ek chhuan bhar se kāfūr hue añg añg ke dukh

pyāsī jogan dhartī kī siskī sun kar ram ho na sakā

phir to jhamā-jham TuuT ke barse bādal mast malang ke dukh

phir vahī ḳhvāb kī ḳhushbū hai vahī sahrā hai par thak ga.e ham

yaar shikārī tiir chalā ab har le is sārang ke dukh

ek taswir pe khinch rakhe hain tu ne kitne rang ke dukh

mere musawwir tujh se bane nai lekin mere Dhang ke dukh

yar teri wo nasri chinta tu ne sunai sab ne suni

kaun sunega jab main chheDunga apne aahang ke dukh

ishq-o-junun ki jang hui kal raat badan ke maidan mein

dil ko aaj manane honge biti raat ki jang ke dukh

qismat ki har thap ko main sangit banaun tu gae

tak-dhan-ta ki dhun par raqs karen phir mujh mirdang ke dukh

jaise ek sayyaad ki aahaT pa kar panchhi ho gae phur

teri ek chhuan bhar se kafur hue ang ang ke dukh

pyasi jogan dharti ki siski sun kar ram ho na saka

phir to jhama-jham TuT ke barse baadal mast malang ke dukh

phir wahi KHwab ki KHushbu hai wahi sahra hai par thak gae hum

yar shikari tir chala ab har le is sarang ke dukh