ek tera tasawwur hi aaKHiri sahaara hai

ik tirā tasavvur hī āḳhirī sahārā hai

varna dil kā ā.īna kab se pāra-pāra hai

zindagī ḳhabar bhī hai bevafā zamāne meñ

maiñ ne terī zulfoñ ko kis tarah sañvārā hai

ek dil kī tanhā.ī aur sau ġham-e-daurāñ

maiñ ne dard-e-duniyā pe dard-e-dil ko vaarā hai

maiñ huuñ is kināre par tum ho us kināre par

biich meñ samundar kā kitnā tez dhārā hai

dil taḌap ga.e hoñge baaġh meñ 'anādil ke

maiñ ne bevafā tujh ko jis tarah pukārā hai

izhdihām-e-jalva hai bārish-e-tajallī hai

dāman-e-nazar kis ne shauq se pasārā hai

log Thiik kahte haiñ qabr par mirī aa kar

maut se ye kyā martā zindagī ne maarā hai

dil ke ābgīne ko Thes lag ga.ī kaise

kyā kisī ne phir mujh ko duur se pukārā hai

bol tere kānoñ se kis kī chīḳh Takrā.ī

haa.e kitnā larzīda terā goshvāra hai

ai 'sahar' chale aate tum bhī sair-e-gulshan ko

bād-e-nau-bahārī hai shabnamī nazzārā hai

ek tera tasawwur hi aaKHiri sahaara hai

warna dil ka aaina kab se para-para hai

zindagi KHabar bhi hai bewafa zamane mein

main ne teri zulfon ko kis tarah sanwara hai

ek dil ki tanhai aur sau gham-e-dauran

main ne dard-e-duniya pe dard-e-dil ko wara hai

main hun is kinare par tum ho us kinare par

bich mein samundar ka kitna tez dhaara hai

dil taDap gae honge bagh mein 'anadil ke

main ne bewafa tujh ko jis tarah pukara hai

izhdiham-e-jalwa hai barish-e-tajalli hai

daman-e-nazar kis ne shauq se pasara hai

log Thik kahte hain qabr par meri aa kar

maut se ye kya marta zindagi ne mara hai

dil ke aabgine ko Thes lag gai kaise

kya kisi ne phir mujh ko dur se pukara hai

bol tere kanon se kis ki chiKH Takrai

hae kitna larzida tera goshwara hai

ai 'sahar' chale aate tum bhi sair-e-gulshan ko

baad-e-nau-bahaari hai shabnami nazzara hai