ek umr hui aur main apne se juda hun

ik umr huī aur maiñ apne se judā huuñ

ḳhushbū kī tarah ḳhud ko sadā DhūñD rahā huuñ

har lamha tirī yaad ke saa.e meñ kaTā hai

thak thak ke har ik gaam pe jab baiTh gayā huuñ

tū laakh judā mujh se rahe paas hai mere

tū gumbad-e-hastī hai to maiñ is kī sadā huuñ

har saañs tirī bād-e-sahar kā koī jhoñkā

maiñ phuul nahīñ aur tire raste meñ khilā huuñ

tasvīr kī har nok palak hai mire ḳhuuñ se

ik rañg huuñ maiñ aur tire ḳhvāboñ meñ ghulā huuñ

har saañs chalī aatī hai jaañ haath meñ le kar

maiñ sochtā huuñ maiñ bhī koī koh-e-nidā huuñ

zinda huuñ ki marnā mirī qismat meñ likhā hai

har roz gunāhoñ kī sazā kaaT rahā huuñ

ik ālam-e-tanhā.ī hai kuchh dekhā huā sā

shāyad ki maiñ apne hī bayābāñ meñ khaḌā huuñ

ye haal mirā merī mohabbat kā sila hai

jo apne hī dāman se bujhā ho vo diyā huuñ

tū chāñd hai maiñ chāñd kā anjām-e-safar huuñ

āñkhoñ meñ tirī duur kahīñ Duub gayā huuñ

rusvā huuñ magar ḳhud se chhupā phirtā huuñ 'tābish'

apne se nihāñ saare zamāne pe khulā huuñ

ek umr hui aur main apne se juda hun

KHushbu ki tarah KHud ko sada DhunD raha hun

har lamha teri yaad ke sae mein kaTa hai

thak thak ke har ek gam pe jab baiTh gaya hun

tu lakh juda mujh se rahe pas hai mere

tu gumbad-e-hasti hai to main is ki sada hun

har sans teri baad-e-sahar ka koi jhonka

main phul nahin aur tere raste mein khila hun

taswir ki har nok palak hai mere KHun se

ek rang hun main aur tere KHwabon mein ghula hun

har sans chali aati hai jaan hath mein le kar

main sochta hun main bhi koi koh-e-nida hun

zinda hun ki marna meri qismat mein likha hai

har roz gunahon ki saza kaT raha hun

ek aalam-e-tanhai hai kuchh dekha hua sa

shayad ki main apne hi bayaban mein khaDa hun

ye haal mera meri mohabbat ka sila hai

jo apne hi daman se bujha ho wo diya hun

tu chand hai main chand ka anjam-e-safar hun

aankhon mein teri dur kahin Dub gaya hun

ruswa hun magar KHud se chhupa phirta hun 'tabish'

apne se nihan sare zamane pe khula hun