ek umr mah-o-sal ki Thokar mein raha hun

ik umr mah-o-sāl kī Thokar meñ rahā huuñ

maiñ sañg sahī phir bhī sar-e-rāh-e-vafā huuñ

aap apne hī nā-karda gunāhoñ kī sazā huuñ

āvāz huuñ lekin tire hoñToñ se judā huuñ

kyā kam hai ki rusvā-e-jahāñ huuñ tirī ḳhātir

maiñ daaġh huuñ lekin tire māthe pe sajā huuñ

paanī meñ nazar aatī hai ik chāñd sī sūrat

pyāsā huuñ magar der se dariyā pe khaḌā huuñ

ik tū hī nahīñ aur bhī ḳhūbān-e-jahāñ haiñ

tujh ko nahīñ paayā hai to auroñ se milā huuñ

sab des mire des haiñ sab log mire log

kyā jāniye maiñ kaun sī miTTī kā banā huuñ

ek umr mah-o-sal ki Thokar mein raha hun

main sang sahi phir bhi sar-e-rah-e-wafa hun

aap apne hi na-karda gunahon ki saza hun

aawaz hun lekin tere honTon se juda hun

kya kam hai ki ruswa-e-jahan hun teri KHatir

main dagh hun lekin tere mathe pe saja hun

pani mein nazar aati hai ek chand si surat

pyasa hun magar der se dariya pe khaDa hun

ek tu hi nahin aur bhi KHuban-e-jahan hain

tujh ko nahin paya hai to auron se mila hun

sab des mere des hain sab log mere log

kya jaaniye main kaun si miTTi ka bana hun