ek umr mein ab samjha duniya ka ye hasil tha

ik umr meñ ab samjhā duniyā kā ye hāsil thā

jo naqsh thā dhokā thā jo rañg thā bātil thā

hañgāma-e-hastī se fursat jo milī dekhā

ik dāġh-e-nadāmat hī kul ziist kā hāsil thā

ai mauj-e-lab-e-dariyā sar piiT na tū apnā

jo ġharq huā us meñ āzurda-e-sāhil thā

kuchh zauq-e-samā.at hī duniyā ko na thā varna

har sāz-e-ḳhamoshī meñ ik zamzama-e-dil thā

tūfān-e-havādis meñ jab ġhaur kiyā maiñ ne

ḳhud aap hī dariyā thā ḳhud aap hī sāhil thā

duniyā-e-mohabbat meñ ka.aba thā na but-ḳhāna

har naqsh-e-qadam terā ek sajda-gah-e-dil thā

har saañs se paidā thā ik mahshar-e-rusvā.ī

maanā ki tirā 'razmī' ḳhāmosh thā ġhāfil thā

ek umr mein ab samjha duniya ka ye hasil tha

jo naqsh tha dhoka tha jo rang tha baatil tha

hangama-e-hasti se fursat jo mili dekha

ek dagh-e-nadamat hi kul zist ka hasil tha

ai mauj-e-lab-e-dariya sar piT na tu apna

jo gharq hua us mein aazurda-e-sahil tha

kuchh zauq-e-samaat hi duniya ko na tha warna

har saz-e-KHamoshi mein ek zamzama-e-dil tha

tufan-e-hawadis mein jab ghaur kiya main ne

KHud aap hi dariya tha KHud aap hi sahil tha

duniya-e-mohabbat mein kaba tha na but-KHana

har naqsh-e-qadam tera ek sajda-gah-e-dil tha

har sans se paida tha ek mahshar-e-ruswai

mana ki tera 'razmi' KHamosh tha ghafil tha