اک وہ بھی دن تھے ڈرتے تھے جب تیرگی سے ہم

اک وہ بھی دن تھے ڈرتے تھے جب تیرگی سے ہم

گھبرا رہے ہیں آج بہت روشنی سے ہم

جینے کی دے رہا ہے دعا چارہ گر ہمیں

مایوس ہو گئے ہیں غم زندگی سے ہم

اچھا ہوا کہ تو نے ہمیں اب بھلا دیا

تنگ آ گئے تھے یار تری دوستی سے ہم

یہ زندگی ہے یا کہ مسلسل عذاب ہے

دو چار دن گزار نہ پائے خوشی سے ہم

پل بھر میں الفتیں ہیں تو پل بھر میں نفرتیں

کیسے نبھائیں حسن کی بازی گری سے ہم

امید تھی کہ دے کے صدا تم بلاؤ گے

گزرے تھے بار بار تمہاری گلی سے ہم

ویسے ہمارے آگے مسائل ہزارہا

ہنس ہنس کے مل رہے ہیں مگر ہر کسی سے ہم

مرنے کا اے جمالؔ ہمیں ڈر ہو کس لئے

آئے تھے کب جہاں میں کچھ اپنی خوشی سے ہم