ek wo bhi din the Darte the jab tirgi se hum

ik vo bhī din the Darte the jab tīrgī se ham

ghabrā rahe haiñ aaj bahut raushnī se ham

jiine kī de rahā hai du'ā chārāgar hameñ

māyūs ho ga.e haiñ ġham-e-zindagī se ham

achchhā huā ki tū ne hameñ ab bhulā diyā

tang aa ga.e the yaar tirī dostī se ham

ye zindagī hai yā ki musalsal 'azāb hai

do-chār din guzār na paa.e ḳhushī se ham

pal bhar meñ ulfateñ haiñ to pal bhar meñ nafrateñ

kaise nibhā.eñ husn kī bāzīgarī se ham

ummīd thī ki de ke sadā tum bulāoge

guzre the baar baar tumhārī galī se ham

vaise hamāre aage masā.il hazār-hā

hañs hañs ke mil rahe haiñ magar har kisī se ham

marne kā ai 'jamāl' hameñ Dar ho kis liye

aa.e the kab jahāñ meñ kuchh apnī ḳhushī se ham

ek wo bhi din the Darte the jab tirgi se hum

ghabra rahe hain aaj bahut raushni se hum

jine ki de raha hai du'a chaaragar hamein

mayus ho gae hain gham-e-zindagi se hum

achchha hua ki tu ne hamein ab bhula diya

tang aa gae the yar teri dosti se hum

ye zindagi hai ya ki musalsal 'azab hai

do-chaar din guzar na pae KHushi se hum

pal bhar mein ulfaten hain to pal bhar mein nafraten

kaise nibhaen husn ki bazigari se hum

ummid thi ki de ke sada tum bulaoge

guzre the bar bar tumhaari gali se hum

waise hamare aage masail hazar-ha

hans hans ke mil rahe hain magar har kisi se hum

marne ka ai 'jamal' hamein Dar ho kis liye

aae the kab jahan mein kuchh apni KHushi se hum