اک یہی شغل تو میں دم ہمہ دم کرتا ہوں

اک یہی شغل تو میں دم ہمہ دم کرتا ہوں

دشت کے بعد ترے کوچے میں رم کرتا ہوں

چشم بے خوابی کے عالم سے گزرتی ہے مری

اور میں خواب معانی کو رقم کرتا ہوں

خواہ وہ ذات میں آئینۂ خود سر کہلائے

میں بہرحال بڑے ناز و نعم کرتا ہوں

میں سر بزم تری شوخیٔ وحشت کے حضور

جاں کھپاتا ہوں بہت تب کوئی غم کرتا ہوں

رنگ و فرہنگ سے تسخیر زیادہ نہ ہوئی

اور پہلے سے میں امید بھی کم کرتا ہوں

سربسر عمر دو روزہ تو مجھے سہل نہیں

اک الگ وضع سے میں خود کو بہم کرتا ہوں

کب وہ پیغام رسا ہو کہ مجھے صبر نہیں

کاکل خم کے لئے شعر رقم کرتا ہوں