اک زلزلہ سکوت کا تنہائیوں میں ہے

اک زلزلہ سکوت کا تنہائیوں میں ہے

کتنا سکون عشق کی رسوائیوں میں ہے

ہوتے رہیں طویل نگاہوں کے فاصلے

دل کا ملن تو یادوں کی گہرائیوں میں ہے

سب سے بڑا فریب ہے دنیا کی زندگی

دنیا تو چند روز کی شہنائیوں میں ہے

گھلتا ہے اب نگاہوں میں نصف النہار مہر

اتنی تپش جمال کی انگڑائیوں میں ہے

کرنے لگے ہیں لوگ گنہ کی وضاحتیں

پاکیزگی نگاہوں کی سچائیوں میں ہے

اخترؔ کو ہے گماں کہ ادب کا ہے وہ نصاب

لیکن غزل تو قافیہ پیمائیوں میں ہے