ek zamin-doz aasman hun main

ik zamīñ-doz āsmāñ huuñ maiñ

haañ mirī jaan be-nishāñ huuñ maiñ

mujh ko tauhīd ho chukī azbar

lā-makāñ kā nayā makāñ huuñ maiñ

dast-e-qudrat kī shāh-kārī kā

ḳhud meñ ābād ik jahāñ huuñ maiñ

kab se āmāda sajda-rezī par

āb-o-gil hī ke darmiyāñ huuñ maiñ

maut se kahiye aa.e fursat meñ

abhī masrūf-e-imtihāñ huuñ maiñ

kis tarah se bane ziyāda baat

zarra-e-kun huuñ kam-zabāñ huuñ maiñ

lau se bahtī huī ziyā ho tum

lau se uThtā huā dhuāñ huuñ maiñ

jaise tū merā rāz-e-pinhāñ hai

aise hī terā rāz-dāñ huuñ maiñ

jis se larzāñ hai pattharoñ kā vajūd

ā.īna-zād vo fuġhāñ huuñ maiñ

maut to kab kī mar chukī lekin

bazm-e-imkāñ meñ jāvedāñ huuñ maiñ

tum tasalsul na.ī bahāroñ kā

aur ujḌī huī ḳhizāñ huuñ maiñ

terī yādoñ kā is meñ dosh nahīñ

be-sabab aaj nīm-jāñ huuñ maiñ

ek zamin-doz aasman hun main

han meri jaan be-nishan hun main

mujh ko tauhid ho chuki azbar

la-makan ka naya makan hun main

dast-e-qudrat ki shah-kari ka

KHud mein aabaad ek jahan hun main

kab se aamada sajda-rezi par

aab-o-gil hi ke darmiyan hun main

maut se kahiye aae fursat mein

abhi masruf-e-imtihan hun main

kis tarah se bane ziyaada baat

zarra-e-kun hun kam-zaban hun main

lau se bahti hui ziya ho tum

lau se uThta hua dhuan hun main

jaise tu mera raaz-e-pinhan hai

aise hi tera raaz-dan hun main

jis se larzan hai pattharon ka wajud

aaina-zad wo fughan hun main

maut to kab ki mar chuki lekin

bazm-e-imkan mein jawedan hun main

tum tasalsul nai bahaaron ka

aur ujDi hui KHizan hun main

teri yaadon ka is mein dosh nahin

be-sabab aaj nim-jaan hun main