ek zara si chah mein jis roz bik jata hun main

ik zarā sī chaah meñ jis roz bik jaatā huuñ maiñ

aa.ine ke sāmne us din nahīñ aatā huuñ maiñ

rañj ġham us se chhupātā huuñ maiñ apne laakh par

paḌh hī letā hai vo chehra phir bhī jhuTlātā huuñ maiñ

qarz kyā laayā maiñ ḳhushiyāñ zindagī se ek din

roz kartī hai taqāza aur jhuñjhlātā huuñ maiñ

hausla to dekhiye merā ġhazal kī khoj meñ

apne hī siine meñ ḳhanjar sā utar jaatā huuñ maiñ

de sazā-e-maut yā phir baḳhsh de tū zindagī

kashmakash se yaar terī saḳht ghabrātā huuñ maiñ

maun vo paḌhtā nahīñ aur shabd bhī suntā nahīñ

jo bhī kahnā chāhtā huuñ kah nahīñ paatā huuñ maiñ

ḳhvāb sach karne chalā thā gaañv se maiñ shahr ko

niiñd bhī kho kar yahāñ 'ālok' pachhtātā huuñ maiñ

ek zara si chah mein jis roz bik jata hun main

aaine ke samne us din nahin aata hun main

ranj gham us se chhupata hun main apne lakh par

paDh hi leta hai wo chehra phir bhi jhuTlata hun main

qarz kya laya main KHushiyan zindagi se ek din

roz karti hai taqaza aur jhunjhlata hun main

hausla to dekhiye mera ghazal ki khoj mein

apne hi sine mein KHanjar sa utar jata hun main

de saza-e-maut ya phir baKHsh de tu zindagi

kashmakash se yar teri saKHt ghabraata hun main

maun wo paDhta nahin aur shabd bhi sunta nahin

jo bhi kahna chahta hun kah nahin pata hun main

KHwab sach karne chala tha ganw se main shahr ko

nind bhi kho kar yahan 'alok' pachhtata hun main