iKHlas ki qadron ka sawali hai to la hath

iḳhlās kī qadroñ kā savālī hai to lā haath

ham log isī shahr ke baasī haiñ milā haath

logoñ ne sukūñ DhūñD liyā shahr meñ jā kar

ham DhūñDne jaate haiñ to aatī hai balā haath

dariyā ke talātum se taḌapne kī adā siikh

jiinā hai to mañjdhār ke andar bhī hilā haath

ruḳhsat huī fir.aun ke mahloñ se ḳhudā.ī

niklā jo garebān se ik nuur bharā haath

jiine kī tamanna thī ki thā āḳhirī paiġhām

aatā thā nazar Dūbne vaale kā uThā haath

lagtā hai ki mābain hai mīloñ kī masāfat

thā us kā mirā fāsla bas haath savā haath

tashkīk ke girdāb Dubote haiñ ilāhī

DhūñDe hai tire haath ko aise meñ mirā haath

'anjum' yahāñ saf-ārā haiñ jādūī sañpole

jiinā hai to kar sehr-shikan ek asā haath

iKHlas ki qadron ka sawali hai to la hath

hum log isi shahr ke basi hain mila hath

logon ne sukun DhunD liya shahr mein ja kar

hum DhunDne jate hain to aati hai bala hath

dariya ke talatum se taDapne ki ada sikh

jina hai to manjdhaar ke andar bhi hila hath

ruKHsat hui firaun ke mahlon se KHudai

nikla jo gareban se ek nur bhara hath

jine ki tamanna thi ki tha aaKHiri paigham

aata tha nazar Dubne wale ka uTha hath

lagta hai ki mabain hai milon ki masafat

tha us ka mera fasla bas hath sawa hath

tashkik ke girdab Dubote hain ilahi

DhunDe hai tere hath ko aise mein mera hath

'anjum' yahan saf-ara hain jadui sanpole

jina hai to kar sehr-shikan ek asa hath