ilahi dil wo de jo mahram-e-asrar ho jae

ilāhī dil vo de jo mahram-e-asrār ho jaa.e

kahīñ aisā na ho jiinā mirā be-kār ho jaa.e

vo kaisā dil hai dil jo dard se bezār ho jaa.e

vo kaisī zindagī jo zindagī par baar ho jaa.e

isī meñ hai ḳhushī har ġham se mujh ko pyaar ho jaa.e

jo honā ho vo merī jaan ko āzār ho jaa.e

anādil naġhma-zan hoñ to chaman bedār ho jaa.e

pareshāñ bū-e-gul ho to fazā sarshār ho jaa.e

alam-bardār-e-amn-o-āshtī hoshyār ho jaa.e

taqāzā vaqt kā ye hai ki duniyā-dār ho jaa.e

ye maanā parda-dārī bhī bahut pur-lutf hotī hai

burā kyā hai mohabbat kā agar iz.hār ho jaa.e

mizāj-e-ahl-e-dil kī imtiyāzī shaan to dekho

jo dushman jān-o-dil kā hai usī se pyaar ho jaa.e

kuchh aisī baat ho jo mūjib-e-taskīn-e-ḳhātir ho

vo kyā iqrār hai jo bā.is-e-āzār ho jaa.e

maiñ apnī vaz.a-dārī haath se jaane nahīñ dūñgā

agar saarā jahāñ bhī darpai-e-āzār ho jaa.e

ġham-o-andoh meñ to muskurānā merī fitrat hai

rahūñ afsurda-dil to zindagī dushvār ho jaa.e

mujhe bechārgī bhī vo atā kar dekh kar jis ko

koī ham-dam koī monis koī ġham-ḳhvār ho jaa.e

vo harf-e-ārzū jis par mukammal zabt hai ab tak

kahīñ aisā na ho sharminda-e-iz.hār ho jaa.e

numā.ish to bajā hai jalva-e-husn-e-mujassam kī

ye lāzim hai nazar shā.ista-e-dīdār ho jaa.e

ġham-o-ālām hī meñ hausle dil ke nikalte haiñ

agar āsāniyāñ hoñ zindagī dushvār ho jaa.e

bashar ko dekhiye da.avā hai tasḳhīr-e-do-ālam kā

ḳhudā jaane ye kyā kar de agar muḳhtār ho jaa.e

'kañval' mai-ḳhvār kyā jaane surūr-e-be-ḳhudī kyā hai

usī se pūchhiye jo be-piye sarshār ho jaa.e

ilahi dil wo de jo mahram-e-asrar ho jae

kahin aisa na ho jina mera be-kar ho jae

wo kaisa dil hai dil jo dard se bezar ho jae

wo kaisi zindagi jo zindagi par bar ho jae

isi mein hai KHushi har gham se mujh ko pyar ho jae

jo hona ho wo meri jaan ko aazar ho jae

anadil naghma-zan hon to chaman bedar ho jae

pareshan bu-e-gul ho to faza sarshaar ho jae

alam-bardar-e-amn-o-ashti hoshyar ho jae

taqaza waqt ka ye hai ki duniya-dar ho jae

ye mana parda-dari bhi bahut pur-lutf hoti hai

bura kya hai mohabbat ka agar izhaar ho jae

mizaj-e-ahl-e-dil ki imtiyazi shan to dekho

jo dushman jaan-o-dil ka hai usi se pyar ho jae

kuchh aisi baat ho jo mujib-e-taskin-e-KHatir ho

wo kya iqrar hai jo bais-e-azar ho jae

main apni waza-dari hath se jaane nahin dunga

agar sara jahan bhi darpai-e-azar ho jae

gham-o-andoh mein to muskurana meri fitrat hai

rahun afsurda-dil to zindagi dushwar ho jae

mujhe bechaargi bhi wo ata kar dekh kar jis ko

koi ham-dam koi monis koi gham-KHwar ho jae

wo harf-e-arzu jis par mukammal zabt hai ab tak

kahin aisa na ho sharminda-e-izhaar ho jae

numaish to baja hai jalwa-e-husn-e-mujassam ki

ye lazim hai nazar shaista-e-didar ho jae

gham-o-alam hi mein hausle dil ke nikalte hain

agar aasaniyan hon zindagi dushwar ho jae

bashar ko dekhiye dawa hai tasKHir-e-do-alam ka

KHuda jaane ye kya kar de agar muKHtar ho jae

'kanwal' mai-KHwar kya jaane surur-e-be-KHudi kya hai

usi se puchhiye jo be-piye sarshaar ho jae