ilahi KHair jo shar wan nahin to yan bhi nahin

ilāhī ḳhair jo shar vaañ nahīñ to yaañ bhī nahīñ

ta.ammul is meñ agar vaañ nahīñ to yaañ bhī nahīñ

kuchh un ghar se nahīñ kam hamārā ḳhāna-e-dil

jo aadmī kā guzar vaañ nahīñ to yaañ bhī nahīñ

vo jaan lete haiñ ham un pe jaan dete haiñ

nasīhatoñ kā asar vaañ nahīñ to yaañ bhī nahīñ

mare miTeñge ham ai dil yahī jo chashmak hai

safā.ī madd-e-nazar vaañ nahīñ to yaañ bhī nahīñ

karegā naaz taḌapne meñ ham se kyā bismil

kamī-e-dard-e-jigar vaañ nahīñ to yaañ bhī nahīñ

vo teġh-zan haiñ to ham bhī jigar pe rokeñgi

jo ehtiyāj-e-sipar vaañ nahīñ to yaañ bhī nahīñ

vo be-ḳhabar haiñ jahāñ se to ham haiñ ḳhud-rafta

zamāne kī jo ḳhabar vaañ nahīñ to yaañ bhī nahīñ

ḳhajil haiñ gāloñ se un ke hamāre dāġhoñ se

faroġh-e-shams-o-qamar vaañ nahīñ to yaañ bhī nahīñ

tum aa.ine meñ ye kis nāznīñ se kahte the

baġhaur dekh kamar vaañ nahīñ to yaañ bhī nahīñ

shab-e-mazār se kuchh kam nahīñ hai shām-e-firāq

agar asīr-e-sahar vaañ nahīñ to yaañ bhī nahīñ

vo gaalī deñge to bosa 'sharaf' maiñ le lūñgā

lihāz-e-pās agar vaañ nahīñ to yaañ bhī nahīñ

ilahi KHair jo shar wan nahin to yan bhi nahin

tammul is mein agar wan nahin to yan bhi nahin

kuchh un ghar se nahin kam hamara KHana-e-dil

jo aadmi ka guzar wan nahin to yan bhi nahin

wo jaan lete hain hum un pe jaan dete hain

nasihaton ka asar wan nahin to yan bhi nahin

mare miTenge hum ai dil yahi jo chashmak hai

safai madd-e-nazar wan nahin to yan bhi nahin

karega naz taDapne mein hum se kya bismil

kami-e-dard-e-jigar wan nahin to yan bhi nahin

wo tegh-zan hain to hum bhi jigar pe rokengi

jo ehtiyaj-e-sipar wan nahin to yan bhi nahin

wo be-KHabar hain jahan se to hum hain KHud-rafta

zamane ki jo KHabar wan nahin to yan bhi nahin

KHajil hain galon se un ke hamare daghon se

farogh-e-shams-o-qamar wan nahin to yan bhi nahin

tum aaine mein ye kis naznin se kahte the

baghaur dekh kamar wan nahin to yan bhi nahin

shab-e-mazar se kuchh kam nahin hai sham-e-firaq

agar asir-e-sahar wan nahin to yan bhi nahin

wo gali denge to bosa 'sharaf' main le lunga

lihaz-e-pas agar wan nahin to yan bhi nahin