ilahi tauba duniya mein ye kaisa inqalab aaya

ilāhī tauba duniyā meñ ye kaisā inqalāb aayā

yahāñ koī nahīñ apnā azīzoñ kā javāb aayā

mire nazzāra-e-pur-shauq kī takmīl kyā hotī

idhar palkoñ ne jumbish kī udhar ruḳh par naqāb aayā

usī kī diid kī ḳhātir rahī haiñ muntazir āñkheñ

jo fitna-gar ruḳh-e-pur-nūr par Daale naqāb aayā

ḳhamoshī hī faqat hai dāstāñ apnī dil-e-muztar

fareb-e-zindagī khāyā alam bhī be-hisāb aayā

vo iz.hār-e-mohabbat par mire ghabrā ke yuuñ bole

falak ne kyā sitam Dhāyā ḳhudāyā kyā azaab aayā

jalan se ġhair ke chehre kī rangat uḌ ga.ī 'nashtar'

abhī ḳhālī hamāre haath meñ jām-e-sharāb aayā

ilahi tauba duniya mein ye kaisa inqalab aaya

yahan koi nahin apna azizon ka jawab aaya

mere nazzara-e-pur-shauq ki takmil kya hoti

idhar palkon ne jumbish ki udhar ruKH par naqab aaya

usi ki did ki KHatir rahi hain muntazir aankhen

jo fitna-gar ruKH-e-pur-nur par Dale naqab aaya

KHamoshi hi faqat hai dastan apni dil-e-muztar

fareb-e-zindagi khaya alam bhi be-hisab aaya

wo izhaar-e-mohabbat par mere ghabra ke yun bole

falak ne kya sitam Dhaya KHudaya kya azab aaya

jalan se ghair ke chehre ki rangat uD gai 'nashtar'

abhi KHali hamare hath mein jam-e-sharab aaya