الٰہی تو مری تقدیر کو تنہائیاں دے دے

الٰہی تو مری تقدیر کو تنہائیاں دے دے

مگر اس کی شبوں کو انجمن آرائیاں دے دے

دلوں کو جذبۂ عشق و محبت بخشنے والے

اسے مشہور کر دے اور مجھے رسوائیاں دے دے

اگر میرے تعلق سے کوئی پیغام دینا ہے

تو لہجہ کو اثر اور فکر کو گہرائیاں دے دے

در و دیوار کی یہ بے حسی کب تک سہوں آخر

مری خلوت کو بھی کچھ عکس کچھ پرچھائیاں دے دے

اداسی تجھ سے جب اعجازؔ دیکھی ہی نہیں جاتی

تو پھر اس غمزدہ ماحول کو شہنائیاں دے دے