ilm ki sham andhera nahin hone deti

'ilm kī sham' añdherā nahīñ hone detī

apne kirdār ko mailā nahīñ hone detī

apne aslāf kī tā'līm hī kuchh aisī hai

azm-o-himmat ko jo paspā nahīñ hone detī

gardish-e-ḳhūn rag-o-pai meñ abhī jaarī hai

ik yahī soch nikammā nahīñ hone detī

ḳhanda-peshānī se har ek se pesh aatā huuñ

merī 'ādat mujhe rusvā nahīñ hone detī

zindagī se mirī vābasta haiñ yuuñ ranj-o-alam

yaad un kī kabhī tanhā nahīñ hone detī

na shikāyat hai thakan kī na gila mehnat kā

zimmedārī mujhe būḌhā nahīñ hone detī

jab se hālāt se samjhautā kiyā hai 'jhanjhaT'

muflisī merā tamāshā nahīñ hone detī

'ilm ki sham' andhera nahin hone deti

apne kirdar ko maila nahin hone deti

apne aslaf ki ta'lim hi kuchh aisi hai

azm-o-himmat ko jo paspa nahin hone deti

gardish-e-KHun rag-o-pai mein abhi jari hai

ek yahi soch nikamma nahin hone deti

KHanda-peshani se har ek se pesh aata hun

meri 'adat mujhe ruswa nahin hone deti

zindagi se meri wabasta hain yun ranj-o-alam

yaad un ki kabhi tanha nahin hone deti

na shikayat hai thakan ki na gila mehnat ka

zimmedari mujhe buDha nahin hone deti

jab se haalat se samjhauta kiya hai 'jhanjhaT'

muflisi mera tamasha nahin hone deti