ilm ko parhez-gari chahiye

ilm ko parhez-gārī chāhiye

gulshanoñ ko ābiyārī chāhiye

sab ko ḳhvāhish hai hukūmat kī magar

himmatoñ meñ pā.edārī chāhiye

ek bo kar kāTte haiñ jab hazār

be-zaroñ kī kisht-kārī chāhiye

gard ūñchī ho ke bantī hai ġhubār

ḳhākiyoñ ko ḳhāksārī chāhiye

tuḳhm bote hī nahīñ milte samar

har jagah ummīd-vārī chāhiye

hukmarānoñ ke liye hai lāzmī

yuuñ to sab ko rāzdārī chāhiye

kah rahe haiñ tajrabe europe ke ye

auratoñ ko parda-dārī chāhiye

aish kī jā ḳhush-dilī darkār hai

ġham-kade meñ sogvārī chāhiye

ḳhatm par har ranj ke jab aish hai

āsiyoñ ko ashk-bārī chāhiye

hākimoñ kī mehrbānī ke liye

mehnat-o-ḳhidmat-guzārī chāhiye

dīn-o-duniyā kī masarrat ke liye

mard-o-zan meñ ḳhush-gavarī chāhiye

afv ko hujjat se jab 'saifī' hai buġhz

ḳhātiyoñ ko sharmsārī chāhiye

ilm ko parhez-gari chahiye

gulshanon ko aabiyari chahiye

sab ko KHwahish hai hukumat ki magar

himmaton mein paedari chahiye

ek bo kar kaTte hain jab hazar

be-zaron ki kisht-kari chahiye

gard unchi ho ke banti hai ghubar

KHakiyon ko KHaksari chahiye

tuKHm bote hi nahin milte samar

har jagah ummid-wari chahiye

hukmaranon ke liye hai lazmi

yun to sab ko raazdari chahiye

kah rahe hain tajrabe europe ke ye

auraton ko parda-dari chahiye

aish ki ja KHush-dili darkar hai

gham-kade mein sogwari chahiye

KHatm par har ranj ke jab aish hai

aasiyon ko ashk-bari chahiye

hakimon ki mehrbani ke liye

mehnat-o-KHidmat-guzari chahiye

din-o-duniya ki masarrat ke liye

mard-o-zan mein KHush-gawari chahiye

afw ko hujjat se jab 'saifi' hai bughz

KHatiyon ko sharmsari chahiye