iltijaen karne wale ko dua se kya gharaz

iltijā.eñ karne vaale ko duā se kyā ġharaz

jis ko ho tujh se ġharaz us ko ḳhudā se kyā ġharaz

pī rahā hai muskurā kar jām-e-sehat maut kā

tere bīmār-e-mohabbat ko shifā se kyā ġharaz

ishq kashtī apnī ḳhud khetā hai apne zor par

nā-ḳhudā se vāsta kyā aur ḳhudā se kyā ġharaz

maiñ huuñ aur ab āstān-e-ishq kī haiñ azmateñ

ab mire sajdoñ ko tere naqsh-e-pā se kyā ġharaz

dil ko ab zauq-e-mohabbat ke maze aane lage

tujh se ab terī jafā se yā vafā se kyā ġharaz

o nigāh-e-multafit be-fā.eda hai iltifāt

dard hī dil meñ nahīñ hai ab davā se kyā ġharaz

ab ghaTā.eñ mai-kade par chhā.īñ to maiñ kyā karūñ

be-dilī ko da.avat-e-āb-o-havā se kyā ġharaz

ruuh ko bālīdgī ho jis meñ ab vo dil nahīñ

ham-nashīñ mujh ko bahār-e-jāñ-fazā se kyā ġharaz

kis qadar ḳhush rah ke mar jaate haiñ mazlūmān-e-ishq

koī ye samjhe inheñ roz-e-jazā se kyā ġharaz

qahr ko bhī jis ke ho ik darguzar se vāsta

us kī rahmat ko mire jurm-o-ḳhatā se kyā ġharaz

ab dil-e-nākām meñ vo nāla-o-naġhma kahāñ

'bismil' ik sāz-e-shikasta ko sadā se kyā ġharaz

iltijaen karne wale ko dua se kya gharaz

jis ko ho tujh se gharaz us ko KHuda se kya gharaz

pi raha hai muskura kar jam-e-sehat maut ka

tere bimar-e-mohabbat ko shifa se kya gharaz

ishq kashti apni KHud kheta hai apne zor par

na-KHuda se wasta kya aur KHuda se kya gharaz

main hun aur ab aastan-e-ishq ki hain azmaten

ab mere sajdon ko tere naqsh-e-pa se kya gharaz

dil ko ab zauq-e-mohabbat ke maze aane lage

tujh se ab teri jafa se ya wafa se kya gharaz

o nigah-e-multafit be-faeda hai iltifat

dard hi dil mein nahin hai ab dawa se kya gharaz

ab ghaTaen mai-kade par chhain to main kya karun

be-dili ko dawat-e-ab-o-hawa se kya gharaz

ruh ko baalidgi ho jis mein ab wo dil nahin

ham-nashin mujh ko bahaar-e-jaan-faza se kya gharaz

kis qadar KHush rah ke mar jate hain mazluman-e-ishq

koi ye samjhe inhen roz-e-jaza se kya gharaz

qahr ko bhi jis ke ho ek darguzar se wasta

us ki rahmat ko mere jurm-o-KHata se kya gharaz

ab dil-e-nakaam mein wo nala-o-naghma kahan

'bismil' ek saz-e-shikasta ko sada se kya gharaz