ilzam bata kaun mere sar nahin aaya

ilzām batā kaun mire sar nahīñ aayā

hisse meñ mire kaun sā patthar nahīñ aayā

ham jo bhī hue haiñ baḌī mehnat se hue haiñ

kaam apne kabhī apnā muqaddar nahīñ aayā

kuchh aur nahīñ bas ye to miTTī kā asar hai

zālim ko kabhī kahnā hunar-var nahīñ aayā

dil kā sabhī darvāza khulā rakkhā hai maiñ ne

par us ko na aanā thā sitamgar nahīñ aayā

muñh moḌ liyā tum ne to ye haal huā hai

vo ghar se gayā aise ki phir ghar nahīñ aayā

ġhazleñ to bahut kahte ho lekin miyāñ 'zāhid'

ab tak tumheñ banñā bhī suḳhanvar nahīñ aayā

ilzam bata kaun mere sar nahin aaya

hisse mein mere kaun sa patthar nahin aaya

hum jo bhi hue hain baDi mehnat se hue hain

kaam apne kabhi apna muqaddar nahin aaya

kuchh aur nahin bas ye to miTTi ka asar hai

zalim ko kabhi kahna hunar-war nahin aaya

dil ka sabhi darwaza khula rakkha hai main ne

par us ko na aana tha sitamgar nahin aaya

munh moD liya tum ne to ye haal hua hai

wo ghar se gaya aise ki phir ghar nahin aaya

ghazlen to bahut kahte ho lekin miyan 'zahid'

ab tak tumhein banna bhi suKHanwar nahin aaya