imtihan-o-sabr ki had kyon paDe taKHir mein

imtihān-o-sabr kī had kyoñ paḌe tāḳhīr meñ

jo na likhvā.e koī likh de mirī taqdīr meñ

ḳhvāb-e-hastī dekhne vaale the kaise bad-nasīb

ḳhvāb kā aalam bhī guzrā dahshat-e-ta.abīr meñ

hashr meñ halchal huī qātil ko ġhash aane lage

aa.e vo kuchh be-gunah jakḌe hue zanjīr meñ

in nasīboñ par thī qudrat se ulajhne kī umang

umr bhar choTeñ chalīñ tadbīr aur taqdīr meñ

aur hī aalam hai kuchh duniyā-e-husn-o-ishq kā

hai yahāñ jo shai bhī hai Duubī huī tāsīr meñ

naaz sajde meñ adā hairat meñ jalve vajd meñ

dil ne ye dekhā harīm-e-dost kī tasvīr meñ

zarre zarre se sadā-e-bāzgasht aane lagī

aur kyā hotā asar zālim tirī taqrīr meñ

dil ko paidā karke fitrat ḳhud ġhazab meñ paḌ ga.ī

mahv hai iḳhfā-e-rāz-e-dahr kī tadbīr meñ

jis meñ thiiñ saarī ḳhayāl-e-yār kī āzādiyāñ

vo dil-e-ram-āfrīñ jakḌā rahā zanjīr meñ

kyoñ kisī ne naqsh-e-āshob-e-tamanna khīñch kar

bhar diyā majbūriyoñ kā rang har tasvīr meñ

allah allah ek zarre kī bhī had miltī nahīñ

rang ho naqqāsh kā itnā to har tasvīr meñ

pā-e-‘beḳhud’ meñ kuchh aisī beḌiyāñ Daalī ga.iiñ

jin se ba.ad-e-hashr bhī chhuTnā na thā taqdīr meñ

imtihan-o-sabr ki had kyon paDe taKHir mein

jo na likhwae koi likh de meri taqdir mein

KHwab-e-hasti dekhne wale the kaise bad-nasib

KHwab ka aalam bhi guzra dahshat-e-tabir mein

hashr mein halchal hui qatil ko ghash aane lage

aae wo kuchh be-gunah jakDe hue zanjir mein

in nasibon par thi qudrat se ulajhne ki umang

umr bhar choTen chalin tadbir aur taqdir mein

aur hi aalam hai kuchh duniya-e-husn-o-ishq ka

hai yahan jo shai bhi hai Dubi hui tasir mein

naz sajde mein ada hairat mein jalwe wajd mein

dil ne ye dekha harim-e-dost ki taswir mein

zarre zarre se sada-e-bazgasht aane lagi

aur kya hota asar zalim teri taqrir mein

dil ko paida karke fitrat KHud ghazab mein paD gai

mahw hai iKHfa-e-raaz-e-dahr ki tadbir mein

jis mein thin sari KHayal-e-yar ki aazadiyan

wo dil-e-ram-afrin jakDa raha zanjir mein

kyon kisi ne naqsh-e-ashob-e-tamanna khinch kar

bhar diya majburiyon ka rang har taswir mein

allah allah ek zarre ki bhi had milti nahin

rang ho naqqash ka itna to har taswir mein

pa-e-‘beKHud’ mein kuchh aisi beDiyan Dali gain

jin se baad-e-hashr bhi chhuTna na tha taqdir mein