ان بتوں سے جو رہ و رسم ہے جاری رکھنا

ان بتوں سے جو رہ و رسم ہے جاری رکھنا

اے خداوند جہاں بات ہماری رکھنا

پالکی اور جنازے میں نہیں ایسا فرق

جو نبھے گور تک اے دل وہ سواری رکھنا

اے غم و درد و الم عیش جہاں فانی ہے

کام آئے گا ملاقات تمہاری رکھنا

گلشن حسن بتاں پھولے پھلے یا اللہ

اس چمن میں اثر باد بہاری رکھنا

چشم بلبل کا کمر بند رگ گل سی کمر

گل بدن کی تمہیں زیبا ہے کٹاری رکھنا

آشنا دوست نہیں بحر فنا اے منعم

چشمۂ فیض ہے دولت اسے جاری رکھنا

دل کی طاقت گھٹے یا نور گھٹے آنکھوں سے

چاہئے خاطر پر نور تمہاری رکھنا

لاکھ احباب ستائیں لب شکوہ نہ کھلیں

مدد اے حوصلہ تو بات ہماری رکھنا

ہمیں برسوں رہے ہیں تیرے لئے خانہ بدوش

کچھ جگہ دل میں جو رکھنا تو ہماری رکھنا

ہم سے باتیں رہیں اوروں سے رہے خاموشی

اتنی اے غنچہ دہن بات ہماری رکھنا

وہ موحد ہوں کہ دن رات ہے رازق سے دعا

ایک سرکار سے روزی مری جاری رکھنا

سر حاسد کے لئے تیغ زباں کافی ہے

مجھ میں عادت مرے استاد کی جاری رکھنا

رشکؔ جب تک رہے محمود رہے دنیا میں

آبرو بندے کی اے حضرت باری رکھنا