in buton se jo rah-o-rasm hai jari rakhna

in butoñ se jo rah-o-rasm hai jaarī rakhnā

ai ḳhudā-vand-e-jahāñ baat hamārī rakhnā

pālkī aur janāze meñ nahīñ aisā farq

jo nibhe gor tak ai dil vo savārī rakhnā

ai ġham-o-dard-o-alam aish-e-jahāñ faanī hai

kaam aa.egā mulāqāt tumhārī rakhnā

gulshan-e-husn-e-butāñ phūle phale yā-allāh

is chaman meñ asar-e-bād-e-bahārī rakhnā

chashm-e-bulbul kā kamar-band rag-e-gul sī kamar

gul-badan kī tumheñ zebā hai kaTārī rakhnā

āshnā dost nahīñ bahr-e-fanā ai mun.im

chashma-e-faiz hai daulat ise jaarī rakhnā

dil kī tāqat ghaTe yā nuur ghaTe āñkhoñ se

chāhiye ḳhātir-e-pur-nūr tumhārī rakhnā

laakh ahbāb satā.eñ lab-e-shikva na khuleñ

madad ai hausla tū baat hamārī rakhnā

hamīñ barsoñ rahe haiñ tere liye ḳhāna-ba-dosh

kuchh jagah dil meñ jo rakhnā to hamārī rakhnā

ham se bāteñ raheñ auroñ se rahe ḳhāmoshī

itnī ai ġhuncha-dahan baat hamārī rakhnā

vo muvahhid huuñ ki din raat hai rāziq se duā

ek sarkār se rozī mirī jaarī rakhnā

sar-e-hāsid ke liye teġh-e-zabāñ kaafī hai

mujh meñ aadat mire ustād kī jaarī rakhnā

'rashk' jab tak rahe mahmūd rahe duniyā meñ

aabrū bande kī ai hazrat-e-bārī rakhnā

in buton se jo rah-o-rasm hai jari rakhna

ai KHuda-wand-e-jahan baat hamari rakhna

palki aur janaze mein nahin aisa farq

jo nibhe gor tak ai dil wo sawari rakhna

ai gham-o-dard-o-alam aish-e-jahan fani hai

kaam aaega mulaqat tumhaari rakhna

gulshan-e-husn-e-butan phule phale ya-allah

is chaman mein asar-e-baad-e-bahaari rakhna

chashm-e-bulbul ka kamar-band rag-e-gul si kamar

gul-badan ki tumhein zeba hai kaTari rakhna

aashna dost nahin bahr-e-fana ai munim

chashma-e-faiz hai daulat ise jari rakhna

dil ki taqat ghaTe ya nur ghaTe aankhon se

chahiye KHatir-e-pur-nur tumhaari rakhna

lakh ahbab sataen lab-e-shikwa na khulen

madad ai hausla tu baat hamari rakhna

hamin barson rahe hain tere liye KHana-ba-dosh

kuchh jagah dil mein jo rakhna to hamari rakhna

hum se baaten rahen auron se rahe KHamoshi

itni ai ghuncha-dahan baat hamari rakhna

wo muwahhid hun ki din raat hai raaziq se dua

ek sarkar se rozi meri jari rakhna

sar-e-hasid ke liye tegh-e-zaban kafi hai

mujh mein aadat mere ustad ki jari rakhna

'rashk' jab tak rahe mahmud rahe duniya mein

aabru bande ki ai hazrat-e-bari rakhna