in dar-o-diwar ki aankhon se paTTi khol kar

in dar-o-dīvār kī āñkhoñ se paTTī khol kar

Dūbte sūraj kā manzar dekh khiḌkī khol kar

ashk āñkhoñ meñ agar kuchh haiñ to kar shab kā safar

rāste meñ āsmāñ baiThā hai jholī khol kar

aur kuchh taaza lakīreñ shakl ke ḳhāke pe haiñ

dekh apne haath kā ā.īna muTThī khol kar

paikar-e-mafhūm ban kar bhī kabhī pahlū meñ aa

lafz dete haiñ sadā bāb-e-ma.ānī khol kar

sat.h-e-dariyā par bhaḌak uThī hai phir maujoñ kī aag

kaun is tūfān meñ utregā kashtī khol kar

le uḌe taa.ir qafas kī tīliyāñ parvāz meñ

ab gale meñ Daal de pairoñ se rassī khol kar

baḌh ga.ī kuchh aur pyāsī ketiyoñ kī tishnagī

abr chhāyā thā magar barsā nahīñ jī khol kar

ho ga.e ābād mere jism ke dīvār-o-dar

kaun ghar meñ aa gayā darvāza ḳhud hī khol kar

dhuup meñ sūkhe hue patte havā dene lage

band lab goyā hue qufl-e-ḳhamoshī khol kar

kyā ajab 'shāhid' ki merī dāstāñ is meñ bhī ho

jo kitāb ik baar bhī maiñ ne na dekhī khol kar

in dar-o-diwar ki aankhon se paTTi khol kar

Dubte suraj ka manzar dekh khiDki khol kar

ashk aankhon mein agar kuchh hain to kar shab ka safar

raste mein aasman baiTha hai jholi khol kar

aur kuchh taza lakiren shakl ke KHake pe hain

dekh apne hath ka aaina muTThi khol kar

paikar-e-mafhum ban kar bhi kabhi pahlu mein aa

lafz dete hain sada bab-e-maani khol kar

sath-e-dariya par bhaDak uThi hai phir maujon ki aag

kaun is tufan mein utrega kashti khol kar

le uDe tair qafas ki tiliyan parwaz mein

ab gale mein Dal de pairon se rassi khol kar

baDh gai kuchh aur pyasi ketiyon ki tishnagi

abr chhaya tha magar barsa nahin ji khol kar

ho gae aabaad mere jism ke diwar-o-dar

kaun ghar mein aa gaya darwaza KHud hi khol kar

dhup mein sukhe hue patte hawa dene lage

band lab goya hue qufl-e-KHamoshi khol kar

kya ajab 'shahid' ki meri dastan is mein bhi ho

jo kitab ek bar bhi main ne na dekhi khol kar